Нормы вады на чалавека

Нормы вады на чалавека

Адказ: Амаль два гады назад уступіла ў сілу Пастанаўленне Савета Міністраў № 1300 “Аб унясенні змяненняў у пастанаўленне Савета Міністраў Рэспублікі Беларусь ад 25 жніўня 1999г. № 1332 і ад 4 лютага 2011 г. № 138”. Згодна з гэтым дакументам, была ўведзена дыферэнцыраваная аплата за паслугі водазабеспячэння і водаадвядзення. Такім чынам, з 1 кастрычніка 2011 года ў Беларусі існуе норма вады на чалавека, за якую мы плацім па сацыяльных цэнах: 140 літраў у суткі або 4,2 кубаметра ў месяц у разліку на аднаго чалавека. Столькі ж вады, колькі чалавек выкарыстоўвае, лічаць камунальнікі, ідзе і ў каналізацыю. Цяпер мы плацім 900 рублёў за кубаметр вады і 550 рублёў – за адзін кубічны метр каналізацыі. Усяго – 1450 рублёў. Калі мы выкарыстоўваем ваду звыш ліміту, аплачваем яе па сабекошце. А гэта цяпер 4550 рублёў за кубаметр вады і 3350 рублёў за кубічны метр каналізацыі – усяго 7900 рублёў. Так што калі ў доме ёсць лічыльнікі, няцяжка падлічыць, колькі сям’я заплаціць у тым ці іншым месяцы. Варта толькі зняць паказанні прыбора. А вось уся вада, патрачаная жыхарамі кватэр і дамоў, дзе лічыльнікаў няма, аплачваецца па сабекошце, або па 7900 рублёў за кубаметр. Як сказала бухгалтар КУШВП ЖКГ “Ганцавіцкая РЖКГ” Наталля Бруй, нормы пры гэтым – адны для ўсіх: лічыцца, што адзін пражываючы выкарыстоўвае 240 літраў вады ў суткі або 8,3 кубаметра за месяц. “Так што выгадней паставіць лічыльнік і плаціць толькі за тую ваду, якой карыстаемся”, – заўважыла Наталля Андрэеўна.