Католікі маліліся за мір і спакой на Ганцаўшчыне

Урачыстасць распачалася ў касцёле Адведзінаў Найсвяцейшай Дзевы Марыі імшою, падчас якой вернікі памаліліся таксама за здароўе і благаславенне для старэйшай парафіянкі касцёла Алены Эдмундаўны Бондар, якой у гэты дзень споўнілася 90 год. Менавіта Алена Бондар разам з іншымі старэйшымі вернікамі ўзняла справу аб пабудове касцёла ў Ганцавічах, прымала самы актыўны ўдзел у яго ўзвядзенні і доўгі час заставалася нязменным старшынёй касцельнага камітэта. Пасля прыняцця Святога Прычасця ўсе вернікі выйшлі з працэсіяй на вуліцы горада.

Чатыры святочна прыбраныя, аздобленыя жывымі кветкамі алтары, якія католікі арганізавалі на вуліцах Кастрычніцкай, Гагарына, Ламаносава і на тэрыторыі касцёла, сімвалізавалі сабою прысутнасць Бога на ўсіх чатырох накірунках свету (Усходзе, Захадзе, Поўдні і Поўначы).

Акрамя людзей шаноўнага і сталага ўзросту, шмат моладзі і дзяцей прынялі ўдзел у святочным шэсці. Гараджане выходзілі на вуліцу, з ушанаваннем успрымалі святочнае дзейства, а некаторыя з іх далучаліся да агульнай працэсіі.