Рэкорд Універсіяды ад нашай зямлячкі

У момант перамогі цяжка стрымаць эмоцыі

Два залатыя медалі прынеслі нашай зямлячцы такі поспех. У мінулы чацвер, 11 ліпеня, Аляксандра перамагла на дыстанцыі 50 метраў батэрфляем з рэкордным для Універсіяды і для Беларусі вынікам 25,84 секунды. А ў пятніцу, 12 ліпеня, яна ўзышла на прыступку п’едэстала пасля таго, як пераадолела дыстанцыю 100 метраў вольным стылем за 53,50 секунды. Далёка ззаду за сабою ў першы дзень спаборніцтваў яна пакінула канадскую і італьянскую плаўчых, у другі дзень – расійскую і амерыканскую: яны занялі другія і трэція месцы.

Сёлетняе лета парадавала 27-гадовую Аляксандру яшчэ адной добрай падзеяй: яна атрымала дыплом Універсітэта народнай гаспадаркі па спецыяльнасці “менеджар-эканаміст”. Раней Аляксандра скончыла Беларускі дзяржаўны ўніверсітэт фізічнай культуры.

Цяпер беларуская “залатая рыбка” збіраецца адправіцца ў Оксфард, каб атрымаць трэцюю адукацыю і палепшыць свае веды па англійскай мове. Менавіта гэта прымусіла спартсменку прыняць рашэнне прапусціць чэмпіянат свету ў Барселоне. “Я была адабрана па нацыянальных нарматывах, але ў гэтым сезоне акцэнт мною быў зроблены на вучобу, некаторы час я не плавала і не была гатова паказваць свой максімум. Пасля Універсіяды адразу еду ў Оксфард, дзе трэба ўдзяліць час вывучэнню англійскай мовы,” – сказала Аляксандра ў інтэрв’ю журналістам.

Дарэчы, Аляксандра ўдзельнічала ва Універсіядзе ўжо трэці раз. Першая з іх праходзіла ў Белгра-дзе ў 2009 годзе, другая – у Шэньчжэне ў 2011-м. Адтуль спартсменка прывезла 2 залатыя, 2 сярэбраныя і 2 бронзавыя ўзнагароды.

Нагадаем, што карані беларускай “залатой рыбкі” – у Будчы, адкуль родам яе тата Віктар Іванавіч. Менавіта ў мясцовым вадаёме Аляксандра ўпершыню паплыла. Цяпер яна плавае ў лепшых басейнах свету, абараняе гонар усёй краіны і дзякуе бацькам за ўсё лепшае, што яны далі ёй. “Дзякуй тату за характар, дзякуй маме за вочы,” – напісана на “сцяне” Аляксандры ў сацыяльнай сетцы “ВКонтакте”.