Ганцавіцкі шашыст выйграў партыю ў чэмпіёна свету

Ганцавіцкі шашыст выйграў партыю ў чэмпіёна свету

Пасля трох тураў ганцаўчанін меў 4 ачкі, перамогу над майстрам спорту з Оршы Аляксандрам Радзівілавічам і нічые з майстрам спорту Вячаславам Палянскім і кандыдатам у майстры спорту Уладзімірам Басінюком з Мінска. У чацвёртым туры ганцаўчанін сустрэўся з легендарным беларускім шашыстам, міжнародным гросмайстрам Аркадзіем Плакхіным – многаразовым чэмпіёнам рэспублікі, чатырохразовым чэмпіёнам Савецкага Саюза, які да таго ж двойчы быў чэмпіёнам свету.

З першых хадоў гросмайстар захапіў цэнтр шашачнага поля. Здавалася, яго саперніку ад паражэння не ўцячы, але ганцаўчанін і не думаў здавацца. Ён акружыў цэнтр гросмайстра, ахвяраваўшы дзве шашкі, прарваўся ў дамкі – і гросмайстар прызнаў сваё паражэнне. Гэта была першая перамога шашыстаў Брэсцкай вобласці над гросмайстрам. Дзякуючы ёй ганцаўчанін трапіў у лідзіруючую групу і трымаўся да апошняга 9-га тура, у якім сустрэўся з майстрам спорту міжнароднага класа Дзмітрыем Фадзеевым (г. Мінск). Ва ўпартай барацьбе з-за недахопу часу ганцаўчанін пайшоў на тэарэтычную нічыю. І калі да нічыёй заставалася падаць рукой, у яго ўпаў сцяжок. Гэтае крыўднае паражэнне адкінула нашага земляка на 9 месца.

Першае месца заняў майстар спорту Ігар Цярэшка (г. Мінск), які набраў 14 ачкоў, другое – майстар спорту міжнароднага класа Дзмітрый Фадзееў г. Мінск), у якога было 13 ачкоў. Трэцім стаў кандыдат у майстры спорту Ягор Ханукаеў з 12-цю ачкамі (г. Мінск). Па 12 ачкоў набралі яшчэ 6 шашыстаў. Усе прызёры атрымалі дыпломы ад Федэрацыі шашак Беларусі і грашовыя прэміі.

Кандыдат у майстры спорту Мікалай Рылка набраў 11 ачкоў (тры перамогі, адно паражэнне і пяць нічыіх). Ганцаўчаніна не абмінула ўзнагарода: у намінацыі “Вэтэраны” сярод 20-ці ўдзельнікаў ён быў першым і атрымаў дыплом і грашовую прэмію.