Рабочыя КПД на свята 1 Мая працавалі ў дзве змены

Па словах майстра вытворчага ўчастка КПД Аляксандра Дубовіка, працаваць вырашылі, каб не спыняць працэс па вытворчасці панэляў і выхадны дзень атрымаць у суботу перад Вялікаднем. На пытанне, ці не было незадаволеных, што прыйшлося выйсці на работу ў святочны дзень, Аляксандр Сяргеевіч адказаў:

“Усім, канешне, не дагодзіш. Але ж людзі зацікаўленыя ў выкананні плана і добрай зарплаце”.

Заплату, па словах работнікаў КПД, зараз плацяць рэгулярна, але невялікую.

“Два з паловаю-тры мільёны атрымліваюць цяпер рабочыя. І ўсё ж гэта не так дрэнна, як некалі, калі ўсё давялі да развалу і прыйшлося звольніцца і ехаць на заробкі у Расію, бо плацілі ўсяго 10 долараў за месяц. Дзяцей жа трэба было на ногі ставіць…,” – сказаў Аляксандр Рытвінскі, фармоўшчык і інструктар, які навучае маладых работнікаў.

Раней ён 20 гадоў працаваў на КПД і вось пасля перапынку вярнуўся і ўжо тры гады зноў працуе на прадпрыемстве.

Зразумелі сітуацыю, чаму прыйшлося працаваць на 1 Мая, і іншыя работнікі.

“У нас зарплата залежыць ад аб’ёму выпушчанай прадукцыі, і, каб зарабіць тыя тры мільёны, што мне плацяць, трэба выканаць план, – сказаў фармоўшчык Дзмітрый Чашанок, які чацвёрты год працуе на камбінаце. – Хацелася б больш, канешне… І нам абяцаюць, што падымуць зарплату, таму і ў святочны дзень працуем і спадзяёмся, што заробім больш. Ну, а адпачнём у іншы дзень”.

Па словах юрыста КПД Дзмітрыя Шабуні, работа ў святочны дзень будзе аплачана ў двайным памеры.