Канкурэнцыю са сталічнымі артыстамі вытрымалі!

Як паясніла кіраўнік калектыву “Удых танца” Алена Варэйка, Палац дзяцей і моладзі “Золак” ветліва сустракаў лепшыя творчыя калектывы г. Мінска. Сярод іх апынуліся і ганцавіцкія танцоры – як уладальнікі дыплома 1-й ступені IV адкрытага музычнага конкурсу дзіцячай і юнацкай творчасці “Новы рух-2014”, які прайшоў 15 лютага ў Мінску. Тады дзяўчаты атрымалі перамогу за танец “Іспанскія матывы”, і за лепшы харэаграфічны нумар калектыў запрасілі на гала-канцэрт гэтага конкурсу.

“На гэты раз 3 красавіка мы выступалі з двума нумарамі. Акрамя “Іспанскіх матываў”, паказалі і “Флэш-данс”, – расказала Алена Аляксандраўна. Па яе словах, мінскія гледачы цёпла сустрэлі ганцаўчан, а арганізатары конкурсу напрыканцы заўважылі, што яны рады, бо знайшлі горад Ганцавічы, дзе ёсць такі калектыў, з якім прыемна супрацоўнічаць.

Так што цяпер “Удых танца” чакае новых запрашэнняў на сталічныя канцэрты і конкурсы: канкурэнцыю яны вытрымалі і сваімі перамогамі даказалі гэта.