Нацкая і Задубенская школы пайшлі “з малатка”

Пачатковая цана аб’ектаў была зніжана на 80% і складала: Нацкай школы – 13 млн 475 тыс руб., Задубенскай – 4 млн 421 тыс руб.

Велізарныя па плошчы будынкі за сімвалічную плату былі прададзены з умовай, што новыя гаспадары будуць выкарыстоўваць іх для прамысловай вытворчасці, грамадскага харчавання, гандлю альбо іншых паслуг.

На базе былых школ уладальнікі павінны стварыць новыя працоўныя месцы. Пакупнікам у арэнду на 30 гадоў будуць прадастаўлены зямельныя ўчасткі – ў Начы 3,3144 га, у Задуб’і 1,5098 га.

Хто канкрэтна купіў будынкі школ і што бу-дзе створана на іх базе, пакуль высветліць не атрымалася.

“Хто канкрэтна купіў будынкі, я не ведаю, бо яшчэ не прыйшлі пратаколы аб правядзенні таргоў”, – адказаў “ГЧ” па тэлефоне намеснік старшыні райвыканкама Артур Грыгаран.

Па словах Артура Уладзіміравіча, уладальнікі самі будуць вызначаць, якімі відамі дзейнасці яны будуць займацца. На працягу двух месяцаў новыя гаспадары павінны заключыць дагавор на арэнду зямельных участкаў, і ў тэрмін не больш як праз два гады пачаць дзейнасць.

Па неафіцыйных звестках, будынак у Начы выкупіў расіянін, а ў Задуб’і – жыхар Брэста. Яны на базе школ плануюць арганізаваць аб’екты агра-экатурызму.

Але не паспелі яшчэ новыя гаспадары аформіць дакументы і ўступіць у законныя правы ўладальніка, а ў аўторак на “гарачую лінію” “ГЧ” звярнуліся жыхары з в. Нача і паведамілі, што трактар расчышчае праезд да спартыўных збудаванняў, размешчаных каля школы, а з горада збіраюцца прыехаць і спілаваць металічныя спартыўныя канструкцыі: турнікі, лесвіцу-рукаход, футбольныя вароты.

Мы звязаліся па тэлефоне са старастам вёскі Нача Леанідам Пісарыкам, які таксама быў у курсе падзей.

“Людзі справядліва падымаюць праблему. Мы не супраць, што прадалі будынкі. Наадварот, добра, што з’явіцца гаспадар, не будуць расцягваць і знішчаць маёмасць. Калі ўладальнікі арганізуюць які агра-экатурызм ці зоймуцца іншай дзейнасцю, то, можа, і мясцовым жыхарам якую працу дадуць? – сказаў Леанід Мікалаевіч. – Але навошта ж вароты і турнікі знішчаць? Хіба яны каму замінаюць? Моладзь прыязджае летам, гэта ж амаль адзіная магчымасць, дзе можна займацца спортам у Начы. Да таго ж, летам і на кожны Вялікдзень начынцы ў футбол гуляюць – “старыкі на маладзёж”. Трэба ж і іх інтарэсы ўлічваць”.

Аўтар гэтага артыкула адразу паведаміў пра званкі жыхароў вёскі начальніку раённага аддзела адукацыі Надзеі Здрок. Надзея Уладзіміраўна абяцала высветліць сітуацыю і разабрацца.

Да выхаду артыкула спартыўныя збудаванні каля былой школы не чапалі.