Ксёндз-біскуп Казімір Велікаселец наведаў Ганцавічы

У гэты дзень, 31 мая, ва ўсім свеце хрысціяне-католікі святкавалі Дзень Адведзінаў Святой Дзевы Марыі (у гэты дзень Дзева Марыя наведала сваю хрышчоную маці, Святую Лізавету, каб падзяліцца з ёю сваёй таямніцай, што народзіць Сына Божага). Для прыхажан ганцавіцкага касцёла гэта асабліва ганаровае свята.

Парафія (прыход) ў Ганцавічах была адноўлена 20 гадоў таму. На працягу гэтага часу, нават тады, калі вернікі маліліся яшчэ падчас будовы касцёла ў капліцы, ксёндз-біскуп К. Велікаселец пастаянна наведваў парафію, выказваў клопат і падтрымку вернікам і святарам парафіі. І сёлета ён прыбыў разам з ксяндзамі іншых парафій у Ганцавічы, каб прыняць удзел у святочнай імшы.

Настаяцель касцёла ксёндз Алег Шпець і прыхажане віталі высокага госця і іншых святароў, дзякавалі за ўвагу і падтрымку, выказвалі шчырую радасць ад магчымасці зноў убачыцца.

У гэты дзень адбылося адкрыццё і асвячэнне каплічкі Святога Іосіфа – апекуна і бацькі Святога Сямейства, якое зрабіў ксёндз-біскуп. Фігурка Святога Іосіфа з маленькім Ісусам на руках – гэта яшчэ адзін напамінак нам пра тое, што Збаўца наш кліча ўсіх быць бліжэй да Бога.