Бярозавы сок бясплатна ці за грошы – кожны вырашае сам

Вядучы інжынер па якасці Ганцавіцкага лясгаса Кацярына Андрэюк расказала “ГЧ”, што, каб бясплатна наспускаць соку, чалавек павінен звярнуцца ў лясніцтва. У кожным лясніцтве адведзены дзялянкі як для прамысловай нарыхтоўкі соку, так і для самастойнага падсочвання бяроз насельніцтвам.

“Чалавека зарэгіструюць, раскажуць, як правільна падсочваць, пакажуць месца, дзе можна спускаць сок. І ён будзе займацца яго нарыхтоўкай самастойна. Усё гэта бясплатна”, – патлумачыла спецыяліст.

Ёсць і другі варыянт: калі няма часу займацца падсочкай самому, то бярозавы сок можна набыць за грошы. Кошт аднаго літра – 12 капеек.
“Выпісаць сок можна ў любым лясніцтве. Пасля аплаты выпішуць таварна-транспартную накладную, пасля чаго можна паехаць на лесасеку і ўзяць сок з-пад той бярозы, якая прыглянецца”, – удакладніла Кацярына Мікалаеўна.

Даведка:

У гэтым годзе плануецца нарыхтаваць 700 тон соку, у мінулым годзе план быў меншы на 100 тон. Насельніцтву ў мінулым годзе было рэалізавана каля 4-ох тон бярозавага соку. Усё астатняе пайшло на перапрацоўчыя заводы.