З каго будзем выбіраць?

Баранавіцкая сельская акруга – гэта адзіная акруга ў Брэсцкай вобласці, дзе зарэгістраваны ўсяго адзін кандыдат у дэпутаты Палаты прадстаўнікоў Нацыянальнага сходу, – Мікалай Язубец, дзеючы старшыня Баранавіцкага райвыканкама.

Яго канкурэнта ад Рэспубліканскай партыі працы і справядлівасці Міхаіла Бобку выбарчая камісія не зарэгістравала.

А вось па Лунінецкай выбарчай акрузе №13 зарэгістраваны тры кандыдаты ў дэпутаты з чатырох, якія падавалі дакументы. Гэта Валянціна Верас, якая ўзначальвае аддзел адукацыі мясцовага райвыканкама, прадпрымальнік Віталь Каратыш с пасёлка Кажан-Гарадок Лунінецкага раёна, а таксама Аляксандр Гарасюк, які працуе на адным з мінскіх прадпрыемстваў і балатуецца ад Партыі БНФ.

Чацвёрты прэтэндэнт ад партыі ЛДП Юрый Дашкевіч не прайшоў этап рэгістрацыі.

Зараз ідзе этап выбарчай гонкі – агітацыя. Толькі дзіўна, што кандыдаты і іх давераныя асобы ў Ганцавічах пакуль не праяўляюць належнай актыўнасці.
А ў Лунінецкай акруговай выбарчай камісіі робяць таямніцу, нават адмаўляючыся прадставіць журналісту кантакты зарэгістраваных кандыдатаў. У сераду член выбарчай камісіі адмовілася прадставіцца і даць нумары тэлефонаў кандыдатаў.

У Цэнтрвыбаркам аўтарам гэтага артыкула на дзеянні члена камісіі была накіравана скарга, і ў наступным нумары мы раскажам, які адказ мы атрымаем.