Светлафоры ў Ганцавічах ёсць, а бяспекі няма

Першым на гэта звярнуў увагу настаяцель Свята-Ціханаўскага храма, айцец Пётр, якому прыходзіцца праязджаць тут на машыне штодзень па некалькі разоў.

“Асабліва небяспечна, калі едзеш з цэнтра і паварочваеш налева. Нядаўна вечарам жанчыну ў цёмным адзенні, без флікера, ледзь разглядзеў на цёмным асфальце”, — расказаў ён.

Вадзіцель з 15-гадовым стажам Аляксандр таксама згодны з тым, што аднаго ліхтара, які асвятляе пешаходны пераход толькі з боку вуліцы Кастрычніцкай, мала.

“Таго, хто рухаецца ў бок храма і выходзіць на дарогу, у цемнаце разглядзець сапраўды складана. А пра флікеры, на жаль, некаторыя пешаходы забываюць”, — заўважае ён.

Ад пешаходнага пераходу на названым участку дарогі і да бліжэйшага ліхтара, па прыблізных прыкідках, каля 25-30 метраў. З такой адлегласці прамень святла “не дастае” да “зебры”. І пакуль не здарылася бяды, сапраўды, гарадскім уладам варта падумаць, як зрабіць скрыжаванне больш бяспечным для гараджан і гасцей райцэнтра.