Малое скрыжаванне з вялікімі праблемамі

Смяецца той, хто смяецца… без наступстваў

Праблема 1: парывы водаправода. У мінулы чацвер у рэдакцыю патэлефанаваў жыхар вуліцы Някрасава Міхаіл Скарына і расказаў, што амаль месяц на названым скрыжаванні выцякае вада з пашкоджаных водаправодных труб. “Сёлета мы адзначаем Год беражлівасці і эканоміі. А тут – цэлая рэчка вады: калі б не канава побач, мы б увогуле паплылі! Колькі ж грошай прыйдзецца заплаціць людзям за такую безгаспадарчасць! Бо каб камунальная служба такое бязладдзе аплачвала са сваёй кішэні, то парывы даўно б устаранілі,” – абураўся Міхаіл Уладзіміравіч.

Менавіта гэты званок прымусіў журналіста адправіцца на “мокрае” скрыжаванне. Яно сапраўды такім аказалася: нягледзячы на тое, што вуліцы даўно “падсушыла” сонца, на скрыжаванні – “мора разліванае”. Вада, відаць, даўно “праклала” для сябе зручныя шляхі да луж і далей, у канаву. Над вялізнай лужынай узвышаюцца тры калы, перавязаныя бруднай стужкай: гэта павінна азначаць “сюды не лезь!”.

“Я тут нядаўна нейкага хлопчыка ратавала: ледзь павыцягвалі ногі з лужыны – так засмактала. Дык ён перепужаўся і так даў лататы!” – успамінае нядаўні выпадак Валянціна Канстанцінаўна Хілюціч.

“Сёлета столькі вады ўліло з неба, а тут яшчэ і з месцаў парываў цэлы месяц вада сцякае акурат у наш агарод. Што ж вырасце ў такім агародзе?! – бядуе Соф’я Ільінічна Дзічка якая жыве па вуліцы Някрасава, акурат каля злашчаснай канавы. Менавіта яна паказвае другі, менш заўважны, але таксама даволі вялікі парыў. – І гарадскія службы не бачаць гэтага! Затое калі мы прывезлі дровы і скінулі каля брамы, дык на другі ж дзень міліцыянер убачыў “непарадак”. Выклікалі нас у “белы дом” і далі штрафу. Дзе справядлівасць?”

Праблема 2: адкрыты люк. Пра яго жыхарам вуліц і расказваць не прыйшлося: ён знаходзіцца акурат каля парыву і “гаворыць” сам за сябе. Яго вялізная дзірка “клапатліва” ахінута з усіх бакоў накрыўкай з кола.

“Гэта мы самі прыкрылі дзірку. Бо надта яна прываблівае дзяцей. А на бяду ж многа не трэба,” – разважае Валянціна Канстанцінаўна Хілюціч.

Люк на гэтым скрыжаванні адкрыты дзесьці ўжо тры гады. “Магчыма, і больш, дакладна не памятаем,” – заўважае Тамара Шаўчынская. Але гэтага часу, відаць, малавата, каб адпаведныя службы адчулі небяспеку.

З пытаннямі, якія тычыліся парываў водаправода і адкрытага люка, журналіст звярнулася да майстра ўчастка вады і каналізацыі КУШВП ЖКГ “Ганцавіцкая РЖКГ” Леаніда Кісялевіча. І вось тут, як кажуць, на пустым месцы, узнікла праблема № 3: немагчымасць атрымаць адказ спецыяліста. У першай тэлефоннай размове Леанід Трафімавіч паабяцаў выехаць на месца і разабрацца з сітуацыяй. Потым на працягу двух дзён на шматлікія званкі ён адказваў, што або моцна заняты і не можа гаварыць, або – за рулём. У супрацоўнікаў рэдакцыі нават склалася адчуванне, што Леанід Кісялевіч як сеў за руль аўтамабіля – так і не вылазіў з-за яго два дні! Вось і думаем: ці не перакваліфікаваўся майстар у вадзіцеля? Хто ж тады будзе рамантаваць трубы і закрываць люк? Падчас апошняй тэлефоннай размовы “па справе” пагаварыць таксама не атрымалася: нястомны працаўнік быў зноў за рулём! Журналісту стала сорамна, што адрывае ад руля такога занятага чалавека, заставалася толькі пажартаваць. Леанід Трафімавіч у адказ рассмяяўся: пэўна, запамятаваў чалавек, што смяецца той, хто смяецца без наступстваў.

Сітуацыі будуць разгледжаны і па магчымасці вырашаны

На іншыя пытанні, якія ўзніклі на названым скрыжаванні, адказы ад спецыялістаў былі атрыманы адразу.

Праблема № 4: тэрыторыя, якая зарасла пустазеллем. Яна знаходзіцца акурат за плотам ганцаўчанкі Ніны Гатоўчыц.

Як вядома, кожны жыхар населенага пункта павінен падтрымліваць чысціню і парадак не толькі ў сваім двары, але і на прылягаючай да домаўладання тэрыторыі да восі праезнай часткі вуліцы па ўсёй даўжыні ўчастка. Аднак, як расказалі суседзі жанчыны, Ніна Дзмітрыеўна гэтага сама рабіць не можа: яна – інвалід 1-й групы, яе дачка жыве ці то ў Расіі, ці то ва Украіне.

“Пакуль мой муж мог, дык падкошваў і сваю тэрыторыю, і гэту. Але ж гады ідуць, сілы не тыя. Як бы гэта дапамагчы суседцы?” – папрасіла Валянціна Канстанцінаўна Хілюціч.

Пазней начальнік па працы, занятасці і сацыяльнай абароне райвыканкама Наталля Клявец здзівілася: “Звычайна ў нас такіх пытанняў не ўзнікае: Ніна Дзмітрыеўна сама тэлефануе, расказвае аб праблемах”. На гэты раз суседзі аказаліся больш спрытнымі. “Мы абавязкова вывучым сітуацыю, і яна будзе вырашана,” – запэўніла Наталля Ігнацьеўна.

Паабяцаў разабрацца з наступнай праблемай і намеснік начальніка КУШВП ЖКГ “Ганцавіцкая РЖКГ” Сяргей Вайцешык. Праблема № 5: небяспечны паварот са скрыжавання на вуліцу Гойшыка. Пясок паступова ссыпаецца ў меліярацыйны канал, і паварот “нахіляецца” ў яго бок. “Хоць бы якую-небудзь агароджу тут зрабіць. Асабліва зімой ездзіць на машыне тут рызыкоўна. Былі выпадкі, калі машыны “навісалі” над канавай і вадзіцелям дапамагалі ратаваць іх аўтамабілі,” – расказваюць жанчыны.

“Вялікага транспартнага руху на вуліцах Калініна і Гойшыка няма. Але мы паглядзім, што там можна зрабіць. Магчыма, установім агароджу. Будзем разбірацца на месцы,” – паабяцаў Сяргей Вайцешык.

Хаця пакуль рэальных вынікаў і няма, аднак калі праблемы будуць вырашаны, журналісты “ГЧ” з задавальненнем працягнуць тэму малога скрыжавання і раскажуць аб тым, як хутка і якасна спрацавалі адпаведныя службы, як клапоцяцца яны аб людзях.